Jean Charles Papi in Giru [Cuncertu Cunfarenza]

L’associu LMO Promozioni è Ghjuvan’ Carlu Papi chì ani comè primu oghjettu a diffesa, a prumuzioni è a tramandera di a lingua corsa sò stati subitu intarissati da l’idea d’una siria di cuncerti pedagogichi par andà à u scontru di paisani chì ani in l’idea di sparghja, di scriva, d’aprudà a lingua corsa incù u scopu primu di tramandà è sparta a noscia lingua in tutti l’urisonti.

 

 

1. A scrittura è a creazioni musicali.

2. L’accunciamenti musicali à u sirviziu di u testu.

3. L’adattazioni di testi scritti in varii lingui stranieri (Inglesu, Spagnolu, Talianu, Purtughesu, Francesu…) in lingua corsa.

 

Ogni tematica saria l’occasioni di prisintà a dimarchja aprudata da Ghjuvan Carlu in si sfarenti esercizii è d’illustrà ogni discursu incù una canzona chì vinaria à muscià cum’idda s’hè cuncretizata issa dimarchja. Vali à dì chì u « cuncertu » saria custruitu in giru à una quindicina di canzoni chì ghjuvariani d’esempii significativi par puntiddà a riflissioni artistica è/o littararia.

Ci sarà ni dinò tempi cunsacrati à u scambiu incù u publicu par fà chè no puddissimu risponda à i dumandi di i participanti fendu cussì di issu mumentu una stonda di spartera è d’interazzioni. Par compia vi vuliami dà qualchi pricizioni nant’à l’oghjettivi pedagogichi d’ogni tematica è supratuttu schjarì a so missa in opara.

 

Issa prima parti saria l’uccazioni di spiigà u travaddu di scrittura di canzoni fendu a distinzzioni tra puisia è canzona. Sarà dinò un tempu par muscià com’iddu si travadda nantu à a lingua (vucabulariu, funetica…) par dalli una diminzioni musicali.

 

A siconda parti di u cuncertu mittarà in lumu u travaddu di l’accunciatori à prò di u testu. L’idea sarà di muscià a dimarchja intillituali è musicali chì si metti à u sirviziu di a lingua criendu una leia forti tra u fondu (u testu) è a forma (a vistitura musicali).

 

Par finiscia, è incù una primura d’apartura, musciaremu i dimarchji è i filusufii chè nò aprudemu in l’eserciziu difficiuli di l’adattazioni (micca a simplici traduzzioni). U principiu sarà di metta in lumu i difficultà di passà da una lingua à l’altra ma supratuttu l’arnesi chì parmettini di supranà issi trappuli : l’adattazzioni di i fiuri, u rolu primu di a funetica, u travaddu nantu à i reti di sunurità è supratuttu l’impurtanza di a prusudia in a ristituzioni di u senzu glubali di a canzona urighjinali.